Inteligjenca Biznesore

Në këtë prezantim të Prishtina Talks, Fuad Gashi — ekspert i Inteligjencës Biznesore me përvojë në menaxhmentin e disa kompanive kosovare shpërndarëse të brendeve ndërkombëtare, dhe themelues i kompanisë Kortones që ofron shërbime BI për bizneset lokale dhe ndërkombëtare — shtjellon një model menaxherial që ende është në fazë fillestare në Kosovë: vendimmarrjen e bazuar në të dhëna.

Prezantimi kalon nëpër tri boshte kryesore. Së pari, historia e Inteligjencës Biznesore nga daljja e kompjuterit të parë komercial në vitet '50-'60, në zhvillimin e sistemeve të menaxhimit të bazave të të dhënave në vitet '80, në shpërthimin e të dhënave nga interneti pas vitit 2000, deri te trendet aktuale me integrimin e AI-së dhe BI-në e vetë-shërbimit. Së dyti, procesi teknik i BI-së — nga identifikimi i burimeve të brendshme dhe të jashtme, te ETL-ja (ekstraktim, transformim, ngarkim), modelimi analitik i të dhënave dhe vizualizimi për vendimmarrje.

Së treti, përfitimet konkrete për një kompani: vendimmarrje e informuar në vend të intuitës, efikasiteti nga automatizimi i raporteve të përsëritura, dhe avantazhi konkurrues nga qasja në kohë reale në trendet e tregut. Fuadi mbyll me një pasqyrë të një dashboard-i real ku një menaxher mund të shohë të gjitha treguesit kryesorë të kompanisë të përditësuar automatikisht, dhe të bëjë pyetje në gjuhë natyrale për të dhënat.

Disa pika që trajtohen:

📌 Historia e BI-së nga vitet '50 deri te kultura e sotme bazuar në të dhëna 📌 Tri makro-trendet: integrimi me AI, BI vetë-shërbim, dhe përpunimi i gjuhës natyrore 📌 Procesi ETL: nga burimet e papërpunuara te raporti final 📌 Analogjia e shefit të kuzhinës për të kuptuar modelimin e të dhënave 📌 Vendimmarrje e informuar vs vendimmarrje me intuitë

📍 Prishtina Talks

Mendimet dhe qëndrimet e shprehura nga mysafirët tanë janë të vetë folësve dhe nuk përfaqësojnë domosdoshmërisht qëndrimet e Prishtina Talks.